UPI വ്യാപാര ഇടപാടുകൾക്ക് MDR നിരക്ക് ദീപാവലിക്ക് ശേഷം; തീയതി പിന്നീട്

തിരഞ്ഞെടുത്ത വ്യക്തി-വ്യാപാര (P2M) യുപിഐ ഇടപാടുകളിലെ മെർച്ചന്റ് ഡിസ്കൗണ്ട് റേറ്റ് (MDR) ദീപാവലിക്ക് തൊട്ടുപിന്നാലെ നടപ്പിലാക്കുമെന്ന് നാഷണൽ പേയ്‌മെന്റ് കോർപ്പറേഷൻ ഓഫ് ഇന്ത്യ (NPCI) ചൊവ്വാഴ്ച അറിയിച്ചു. പുതിയ തീയതി പിന്നീട് അറിയിക്കുമെന്നും എൻപിസിഐ വ്യക്തമാക്കി. മുമ്പ് ഒക്ടോബർ 15 മുതൽ 2,000 രൂപയ്ക്ക് മുകളിലുള്ള പി2എം യുപിഐ ഇടപാടുകൾക്ക് 0.4% എംഡിആർ ബാധകമാകുമെന്നായിരുന്നു അറിയിച്ചിരുന്നത്. ഈ തുക ഉപഭോക്താക്കളല്ല, വ്യാപാരികളാണ് നൽകേണ്ടത്.
75,000 രൂപയോ അതിൽ കൂടുതലോ ഉള്ള ഇടപാടുകൾക്ക് ഇത് പരമാവധി 300 രൂപയായി നിജപ്പെടുത്തിയിരുന്നു. വ്യക്തികൾ തമ്മിലുള്ള പണമിടപാടുകളും സാധാരണ ചെറിയ വ്യാപാരി ഇടപാടുകളും സൗജന്യമായി തുടരും.
MDR കൊണ്ടുവരുന്നതിന്റെ കാരണം
UPI സംവിധാനത്തിന്റെ പ്രവർത്തനത്തിന് ആവശ്യമായ അടിസ്ഥാന സൗകര്യങ്ങൾ, സൈബർ സുരക്ഷ, തട്ടിപ്പ് തടയൽ, ഉപഭോക്തൃ സേവനം തുടങ്ങിയവയ്ക്കുള്ള ചെലവ് കണ്ടെത്താനാണ് MDR നടപ്പാക്കുന്നതെന്ന് കേന്ദ്ര സർക്കാർ വ്യക്തമാക്കിയിട്ടുണ്ട്. ധനമന്ത്രാലയത്തിന്റെ സെപ്റ്റംബർ ചോദ്യോത്തര രേഖ പ്രകാരം, UPI പ്രവർത്തനങ്ങൾ മുന്നോട്ട് കൊണ്ടുപോകാൻ വർഷംതോറും ഏകദേശം 20,000 കോടി രൂപ ചെലവാകുന്നുണ്ട്. സർക്കാർ നൽകുന്ന പ്രോത്സാഹന ധനസഹായം മാത്രം ദീർഘകാല പരിഹാരമല്ലെന്നാണ് സർക്കാരിന്റെ നിലപാട്

2020 ജനുവരി മുതൽ RuPay ഡെബിറ്റ് കാർഡ് ഇടപാടുകൾക്കും BHIM-UPI ഇടപാടുകൾക്കും MDR പൂജ്യമായി നിശ്ചയിച്ചിരുന്നു. ഡിജിറ്റൽ പേയ്‌മെന്റുകൾ പ്രോത്സാഹിപ്പിക്കാനായിരുന്നു ഈ നടപടി.
തുടർന്ന്, UPI ഇക്കോസിസ്റ്റത്തെ പിന്തുണയ്ക്കുന്നതിനായി സർക്കാർ വിവിധ പ്രോത്സാഹന പദ്ധതികളും നടപ്പാക്കി. 2024-25 സാമ്പത്തിക വർഷത്തിൽ, 2,000 രൂപ വരെ മൂല്യമുള്ള ചെറിയ വ്യാപാരി BHIM-UPI ഇടപാടുകൾ പ്രോത്സാഹിപ്പിക്കാൻ 1,500 കോടി രൂപയുടെ പദ്ധതി സർക്കാർ പ്രഖ്യാപിച്ചിരുന്നു.
ഈ പദ്ധതിയുടെ ഭാഗമായി, 2,000 രൂപ വരെയുള്ള യോഗ്യമായ ഇടപാടുകൾക്ക് MDR ഈടാക്കിയിരുന്നില്ല. പകരം സർക്കാർ തന്നെ പ്രോത്സാഹനത്തുക നൽകിയിരുന്നു.

ഒക്ടോബർ 15-ലെ MDR നടപ്പാക്കൽ ദീപാവലി ഷോപ്പിങ് സീസണുമായി ഒത്തുചേരുമെന്നതിനാൽ ആശങ്കകൾ ഉയർന്നിരുന്നു. ഉത്സവ സീസണിൽ ഉപഭോക്തൃ ചെലവുകൾ ഗണ്യമായി വർധിക്കാറുണ്ട്.

ഇതോടൊപ്പം, പുതിയ ചട്ടം നടപ്പാക്കാൻ പേയ്‌മെന്റ് സേവനദാതാക്കൾക്ക് അവരുടെ സംവിധാനങ്ങൾ നവീകരിക്കാനും സാങ്കേതിക ഒരുക്കങ്ങൾ പൂർത്തിയാക്കാനും കൂടുതൽ സമയം ആവശ്യമായ സാഹചര്യവും പരിഗണിച്ചാണ് തീരുമാനം ദീപാവലിക്ക് ശേഷത്തേക്ക് മാറ്റിയത്.