കൊച്ചി സിനഗോഗിന് സമീപം തീയിടൽ തീവ്രവാദ ബന്ധമെന്ന് പോലീസിന് സംശയം; തിരയുന്നത് ബോസിനെ

പ്രതിയെ പിടികൂടാനായതോടെ സുപ്രധാന ഡിജിറ്റൽ തെളിവുകൾ സുരക്ഷിതമാക്കാൻ പൊലീസിന് കഴിഞ്ഞു. പ്രതിയുടെ മൊബൈൽ ഫോണിൽ നിന്ന് വിദേശബന്ധങ്ങളുണ്ടെന്ന് സംശയിക്കുന്ന വ്യക്തികളുമായും വിവിധ ഓൺലൈൻ ഗ്രൂപ്പുകളുമായും നടത്തിയ ആശയവിനിമയങ്ങൾ കണ്ടെത്തിയിട്ടുണ്ട്. 'ബോസ്' എന്ന് പ്രതി വിശേഷിപ്പിക്കുന്ന ആളുടെ നിർദേശപ്രകാരമാണ് കൃത്യം നിർവഹിച്ചതെന്നും, ഇതിന്റെ ദൃശ്യങ്ങൾ പകർത്തി അയച്ചുകൊടുത്ത് ക്രിപ്റ്റോകറൻസിയിലൂടെ പ്രതിഫലം കൈപ്പറ്റിയതായുമുള്ള വിവരങ്ങളാണ് പുറത്തുവന്നിട്ടുള്ളത്.

യഹൂദ ആരാധനാലയങ്ങൾ ലക്ഷ്യമിട്ടുള്ള ആക്രമണങ്ങളും രാജ്യത്തെ വിവിധ നഗരങ്ങളിൽ സമാനമായ കൃത്യങ്ങൾ നടത്തുന്നതുമായി ബന്ധപ്പെട്ട സന്ദേശങ്ങളും ഫോണിൽ നിന്ന് ലഭിച്ചിട്ടുണ്ട്. ഇതിന്റെ അടിസ്ഥാനത്തിൽ സംഭവത്തിന് പിന്നിൽ രാജ്യാന്തര തീവ്രവാദ ബന്ധങ്ങളോ സംഘടിതമായ ആസൂത്രണമോ ഉണ്ടോ എന്ന് കേന്ദ്ര ഏജൻസികളും പൊലീസും ചേർന്ന് ഗൗരവമായി അന്വേഷിച്ചുവരുന്നു. കൂടാതെ, മൂവാറ്റുപുഴയിൽ മുൻപ് നടന്ന സമാനമായ മറ്റൊരു തീവെപ്പ് കേസിലും പ്രതിക്ക് പങ്കുണ്ടെന്ന് ചോദ്യം ചെയ്യലിൽ തെളിഞ്ഞിട്ടുണ്ട്. ലഹരിമരുന്ന് ഇടപാടുകളുമായി ബന്ധപ്പെട്ട വിവരങ്ങളും പ്രതിയുടെ ഫോണിൽ നിന്ന് കണ്ടെത്തിയിട്ടുണ്ട്.