ഡിആര്‍ഡിഒയില്‍ റിസര്‍ച്ച് അസോസിയേറ്റ്; പ്രതിമാസ ശമ്പളം 54,000 രൂപ

ഡിഫന്‍സ് റിസര്‍ച്ച് ആന്‍ഡ് ഡെവലപ്മെന്റ് ഓര്‍ഗനൈസേഷന്‍ (ഡിആര്‍ഡിഒ) റിസര്‍ച്ച് അസോസിയേറ്റ് തസ്തികകളിലേക്ക് അപേക്ഷ ക്ഷണിച്ചു. 54,000 രൂപ പ്രതിമാസ ശമ്പളമുള്ള തസ്തികളിലേക്കാണ് അപേക്ഷ ക്ഷണിച്ചിരിക്കുന്നത്. താല്‍പ്പര്യവും യോഗ്യതയുമുള്ള ഉദ്യോഗാര്‍ത്ഥികള്‍ക്ക് നല്‍കിയിരിക്കുന്ന തീയതിയിലും സമയത്തും ഡിഫന്‍സ് ലബോറട്ടറി, രത്തനാദ പാലസ്, ജോധ്പൂര്‍-342 011 (രാജസ്ഥാന്‍) എന്ന വിലാസത്തില്‍ വാക്ക്-ഇന്‍ അഭിമുഖത്തില്‍ പങ്കെടുക്കാം. ആകെ ഒഴിവുകളുടെ എണ്ണം 3 ആണ്, പരമാവധി പ്രായം 35 വയസ്സാണ്.

ഫെലോഷിപ്പിന്റെ കാലാവധി 2 വര്‍ഷമാണ്. നിയമങ്ങള്‍ക്കനുസൃതമായി എച്ച് ആര്‍ എയും മെഡിക്കല്‍ സൗകര്യങ്ങളും സഹിതം പ്രതിമാസം 54,000 രൂപ ലഭിക്കും. SC/ST/PH-ന് 5 വര്‍ഷം വരെയും ഒബിസി ഉദ്യോഗാര്‍ത്ഥികള്‍ക്ക് 3 വര്‍ഷം വരെയും പ്രായത്തില്‍ ഇളവ് അനുവദിച്ചിരിക്കുന്നു. എസ്സി/എസ്ടി/ഒബിസി വിഭാഗത്തിലെ ഉദ്യോഗാര്‍ത്ഥികള്‍ യോഗ്യതയുള്ള അതോറിറ്റി നല്‍കുന്ന അസല്‍ ജാതി സര്‍ട്ടിഫിക്കറ്റ് ഹാജരാക്കണം.

കെമിസ്ട്രി/ഫിസിക്സ്/മെറ്റീരിയല്‍ സയന്‍സില്‍ പിഎച്ച്ഡി അല്ലെങ്കില്‍ തത്തുല്യ ബിരുദം അല്ലെങ്കില്‍ മൂന്ന് വര്‍ഷത്തെ ഗവേഷണം, അദ്ധ്യാപനം, ഡിസൈന്‍ ആന്‍ഡ് ഡെവലപ്മെന്റ് പരിചയം എന്നിവയാണ് യോഗ്യത.