അമിത് ഷാ ഇന്ന് ജമ്മു കശ്മീരിലെത്തും; ശ്രീനഗര്‍- ഷാര്‍ജ വിമാന സര്‍വ്വീസ് ഉദ്ഘാടനം ചെയ്യും

മൂന്ന് ദിവസത്തെ സന്ദര്‍ശനത്തിനായി കേന്ദ്ര ആഭ്യന്തര മന്ത്രി അമിത് ഷാ ഒക്ടോബര്‍ 23 ശനിയാഴ്ച ജമ്മു കശ്മീരിലെത്തും.  2019 ഓഗസ്റ്റില്‍ ജമ്മു കശ്മീരിന്റെ പ്രത്യേക പദവി എടുത്തുകളഞ്ഞ ആര്‍ട്ടിക്കിള്‍ 370 റദ്ദാക്കിയതിന് ശേഷം ആദ്യമായാണ് അദ്ദേഹം കേന്ദ്രഭരണ പ്രദേശത്തേക്ക് പോകുന്നത്.പത്തു ദിവസത്തോളം നീണ്ടു നിന്ന പോരാട്ടത്തിനൊടുവിലാണ് നുഴഞ്ഞു കയറിയ  തീവ്രവാദികളെ സൈന്യം കണ്ടെത്തി വകരുത്തിയത്. കൂടാതെ അടിക്കടി സിവിലിന്‍മാര്‍ക്കു നേരേയുണ്ടാകുന്ന അക്രമവും  അവസാനിപ്പിക്കാനുള്ള വഴി തേടുകയാണ് സൈന്യം . അതിനാല്‍ ആഭ്യന്തരമന്ത്രിയുടെ സന്ദര്‍ശനത്തില്‍ എന്തൊക്ക അജണ്ടകളെന്നത് ചര്‍ച്ചാവിഷയമാണ്.

ജമ്മു കശ്മീരിലെ ആദ്യദിവസം കേന്ദ്ര ആഭ്യന്തര മന്ത്രി അമിത് ഷാ ശ്രീനഗറിലെ രാജ്ഭവനില്‍ സുരക്ഷാ, രഹസ്യാന്വേഷണ മേധാവികളുമായി ഉന്നതതല യോഗം നടത്തും. ഈ ഏകീകൃത കമാന്‍ഡ് മീറ്റിംഗില്‍ ഇന്റലിജന്‍സ് ബ്യൂറോ ചീഫ് അരവിന്ദ് കുമാര്‍, സിആര്‍പിഎഫ് ഡയറക്ടര്‍ ജനറല്‍ (ഡിജി) കുല്‍ദീപ് സിംഗ്, നാഷണല്‍ സെക്യൂരിറ്റി ഗാര്‍ഡ് ഡിജി എം എ ഗണപതി, അതിര്‍ത്തി രക്ഷാസേനാ ഡിജി പങ്കജ് സിംഗ്, ജമ്മു കശ്മീര്‍ പോലീസ് ഡിജി ദില്‍ബാഗ് സിംഗ്, ആര്‍മി കമാന്‍ഡര്‍മാര്‍ എന്നിവര്‍ പങ്കെടുക്കും. മറ്റ് ഉദ്യോഗസ്ഥര്‍. ജമ്മു പോലീസ് ഇന്‍സ്‌പെക്ടര്‍ ജനറല്‍, കശ്മീര്‍ പോലീസ് ഇന്‍സ്‌പെക്ടര്‍ ജനറല്‍ എന്നിവര്‍ പങ്കെടുക്കും.

കശ്മീരിലെ ന്യൂനപക്ഷങ്ങളെയും തദ്ദേശീയരല്ലാത്തവരെയും ലക്ഷ്യമിട്ടുള്ള സമീപകാല ഭീകരാക്രമണങ്ങളെക്കുറിച്ചും നിലവിലുള്ള സുരക്ഷാ നടപടികളെക്കുറിച്ചും ദില്‍ബാഗ് സിംഗ് വിശദമായ അവതരണം നടത്തുമെന്ന് പ്രതീക്ഷിക്കുന്നു. ജമ്മു കശ്മീര്‍ പോലീസിനെ ശക്തിപ്പെടുത്തുന്നതിനും സ്‌പെഷ്യല്‍ ഓപ്പറേഷന്‍സ് ഗ്രൂപ്പ് ഉദ്യോഗസ്ഥര്‍ക്ക് മെച്ചപ്പെട്ട വേതനത്തിനും വേണ്ടിയുള്ള ആവശ്യം ഉന്നയിക്കപ്പെട്ടേക്കും

ശ്രീനഗറിനും യുഎഇയിലെ  ഷാര്‍ജയ്ക്കും ഇടയിലുള്ള ആദ്യ അന്താരാഷ്ട്ര ഫ്‌ലൈറ്റ് അമിത് ഷാ വീഡിയോ കോണ്‍ഫറന്‍സിംഗ് വഴി ഉദ്ഘാടനം ചെയ്യും. കഴിഞ്ഞ മാസം കശ്മീരിലേക്കുള്ള യാത്രയില്‍ കേന്ദ്ര വ്യോമയാന മന്ത്രി ജ്യോതിരാദിത്യ സിന്ധ്യ നേരിട്ടുള്ള ശ്രീനഗര്‍-ഷാര്‍ജ വിമാനം ആരംഭിക്കുന്നത് സംബന്ധിച്ച പ്രഖ്യാപനം നടത്തിയിരുന്നു.ജമ്മു കശ്മീരിലെ യൂത്ത് ക്ലബ്ബുകളിലെ അംഗങ്ങളുമായും അമിത് ഷാ വീഡിയോ കോണ്‍ഫറന്‍സിംഗ് വഴി സംവദിക്കും.

ജമ്മു കശ്മീരില്‍ അടുത്തിടെ നടന്ന സിവിലിയന്‍ കൊലപാതകങ്ങളില്‍ കൊല്ലപ്പെട്ടവരുടെ മൂന്ന് കുടുംബങ്ങളെയെങ്കിലും അദ്ദേഹം കാണാനിടയുണ്ട്. കശ്മീരി പണ്ഡിറ്റ് മഖന്‍ ലാല്‍ ബിന്ദ്രൂ, സുപീന്ദര്‍ കൗര്‍, 25 കാരനായ സബ് ഇന്‍സ്പെക്ടര്‍ അര്‍ഷാദ് അഹമ്മദ് മിര്‍ എന്നിവരുടെ കുടുംബങ്ങളെ ആഭ്യന്തരമന്ത്രി സന്ദര്‍ശിച്ചേക്കും. കുടുംബാംഗങ്ങളുടെ വസതികളിലേക്ക് പോകാനാണ് ആഭ്യന്തരമന്ത്രിക്ക് താല്‍പര്യമെന്നാണ് വിവരം. എന്നിരുന്നാലും, സുരക്ഷാ കാരണങ്ങളാല്‍ അവരെ വിളിച്ചുവരുത്തി കാണാനും സാദ്ധ്യതയുണ്ട്. 

സന്ദര്‍ശനത്തിന്റെ രണ്ടാം ദിവസം അമിത് ഷാ ജമ്മുവിലെത്തും. അദ്ദേഹം പാര്‍ട്ടി ഓഫീസില്‍ ബിജെപി പ്രവര്‍ത്തകരെ കാണുകയും തുടര്‍ന്ന് ഭഗവതി നഗറില്‍ ഒരു പൊതു റാലി നടത്തുകയും ചെയ്യും. കേന്ദ്രത്തിന്റെ പ്രചാരണ പരിപാടിയുടെ ഭാഗമായി അദ്ദേഹം ഒരുപക്ഷേ വിവിധ പ്രതിനിധികളെ കാണും.

തുടര്‍ന്ന്  ശ്രീനഗറിലേക്ക് മടങ്ങുന്ന അമിത് ഷാ, പുല്‍വാമ ജില്ലയിലെ ലെത്പോരയിലെ സിആര്‍പിഎഫ് ഗ്രൂപ്പ് സെന്ററില്‍ പുല്‍വാമ ആക്രമണത്തിലെ രക്തസാക്ഷികള്‍ക്ക് ആദരാഞ്ജലി അര്‍പ്പിക്കും. അദ്ദേഹം ജവാന്‍മാര്‍ക്കൊപ്പം സമയം ചെലവഴിക്കുകയും അവരോടൊപ്പം ഭക്ഷണം കഴിക്കുകയും ചെയ്യും.

കേന്ദ്രഭരണ പ്രദേശത്തെ തന്റെ അവസാന ദിനത്തില്‍, കേന്ദ്ര റിസര്‍വ് പോലീസ് സേനയിലെ രക്തസാക്ഷികള്‍ക്ക് അമിത് ഷാ ആദരാഞ്ജലി അര്‍പ്പിക്കും.

അദ്ദേഹം ശ്രീനഗറില്‍ പോയി ഷെര്‍-ഇ-കശ്മീര്‍ ഇന്റര്‍നാഷണല്‍ കണ്‍വെന്‍ഷന്‍ സെന്റര്‍ (SKICC) സന്ദര്‍ശിക്കും. വിവിധ സിവില്‍ സൊസൈറ്റി പ്രതിനിധികളെ കാണുകയും പൊതു റാലിയില്‍ പങ്കെടുക്കും. തുടര്‍ന്ന് എസ്‌കെഐസിസിയിലെ ദാല്‍ തടാകക്കരയില്‍ നടക്കുന്ന സാംസ്‌കാരിക പരിപാടിയില്‍ പ്രശസ്ത സൂഫി ഗായകന്‍ ഷാഫി സോപോരി അവതരിപ്പിക്കും. അമിത് ഷാ അന്നു വൈകുന്നേരം ഡല്‍ഹിയിലേക്ക് മടങ്ങും.

ആഭ്യന്തര മന്ത്രി അമിത് ഷായുടെ സന്ദര്‍ശനത്തിന് മുന്നോടിയായി ജമ്മു കശ്മീരില്‍ വന്‍ സുരക്ഷാ ക്രമീകരണങ്ങളാണ് ഏര്‍പ്പെടുത്തിയിരിക്കുന്നത്. സിആര്‍പിഎഫ്, ബിഎസ്എഫ് എന്നിവയുടെ ഡ്രോണുകള്‍, സ്‌നൈപ്പര്‍മാര്‍, അധിക കമ്പനികള്‍ എന്നിവ ശ്രീനഗറിലേക്ക് വിളിച്ചിട്ടുണ്ട്.