സി.എ. വിദ്യാർഥികൾക്ക് ഫെഡറൽ ബാങ്കിൽ ഇൻഡസ്ട്രിയൽ ട്രെയിനിങ് അവസരം; പ്രതിമാസ സ്റ്റൈപ്പൻഡ് ₹15,000
Federal Bank Invites Applications for CA Industrial Training Programme; ₹15,000 Monthly Stipend
ചാർട്ടേഡ് അക്കൗണ്ടൻസി (സി.എ.) വിദ്യാർഥികൾക്കായി ഇൻഡസ്ട്രിയൽ ട്രെയിനിങ് പ്രോഗ്രാമിലേക്ക് അപേക്ഷ ക്ഷണിച്ച് ഫെഡറൽ ബാങ്ക്. 2026 ഒക്ടോബർ 13-ന് പുറത്തിറക്കിയ അറിയിപ്പ് പ്രകാരം, യോഗ്യതയുള്ള ഉദ്യോഗാർഥികൾക്ക് എറണാകുളത്തെ ബാങ്കിന്റെ പ്രത്യേക വിഭാഗങ്ങളിൽ പരിശീലനത്തിന് അവസരം ലഭിക്കും.
യോഗ്യതാ മാനദണ്ഡങ്ങൾ
സി.എ. ഇന്റർമീഡിയറ്റ് തലത്തിലുള്ള പരീക്ഷ പൂർത്തിയാക്കിയവർക്കും ആർട്ടിക്കിൾഷിപ്പ് ഉൾപ്പെടെയുള്ള പ്രായോഗിക പരിശീലനത്തിൽ കുറഞ്ഞത് ഒമ്പത് മാസം കൂടി ബാക്കിയുള്ളവർക്കും അപേക്ഷിക്കാം. 2026 ഒക്ടോബർ ഒന്നിന് 28 വയസ്സ് കവിയരുത്. അതായത്, 1998 ഒക്ടോബർ ഒന്നിനോ അതിനുശേഷമോ ജനിച്ചവരായിരിക്കണം.
പരിശീലന കാലാവധിയും സ്റ്റൈപ്പൻഡും
കുറഞ്ഞത് ഒമ്പത് മാസവും പരമാവധി 12 മാസവുമാണ് പരിശീലന കാലാവധി. തിരഞ്ഞെടുക്കപ്പെടുന്നവർക്ക് പ്രതിമാസം ₹15,000 സ്റ്റൈപ്പൻഡ് ലഭിക്കും. ഈ തുക എല്ലാ ആനുകൂല്യങ്ങളും ഉൾപ്പെടുന്നതാണ്. ഇതിന് പുറമെ മറ്റ് ആനുകൂല്യങ്ങളോ അലവൻസുകളോ ലഭിക്കില്ല. സ്റ്റൈപ്പൻഡ് ലഭിക്കുന്നതിന് പരിശീലന കാലയളവിലെ തൃപ്തികരമായ പങ്കാളിത്തം നിർബന്ധമാണ്.
കുറഞ്ഞത് ഒമ്പത് മാസത്തെ പരിശീലനം വിജയകരമായി പൂർത്തിയാക്കുന്ന അർഹരായ ട്രെയിനികൾക്ക് ബാങ്ക് പരിശീലന പൂർത്തീകരണ സർട്ടിഫിക്കറ്റ് നൽകും.
തിരഞ്ഞെടുപ്പ് നടപടികൾ
അപേക്ഷകളുടെ പ്രാഥമിക പരിശോധനയും വ്യക്തിഗത അഭിമുഖവുമാണ് തിരഞ്ഞെടുപ്പ് ഘട്ടങ്ങൾ. ഗൂഗിൾ ഫോം വഴി ലഭിക്കുന്ന വിവരങ്ങളുടെ അടിസ്ഥാനത്തിൽ ആവശ്യമായ എണ്ണം ഉദ്യോഗാർഥികളെ ബാങ്ക് ഷോർട്ട്‌ലിസ്റ്റ് ചെയ്യും. തുടർന്ന് ഇവർക്ക് വിശദമായ രജിസ്ട്രേഷൻ ലിങ്ക് നൽകുകയും രജിസ്ട്രേഷൻ പൂർത്തിയാക്കുന്നവരെ വ്യക്തിഗത അഭിമുഖത്തിന് ക്ഷണിക്കുകയും ചെയ്യും.
എങ്ങനെ അപേക്ഷിക്കാം?
താൽപ്പര്യമുള്ള ഉദ്യോഗാർഥികൾ താഴെ നൽകിയിരിക്കുന്ന ഗൂഗിൾ ഫോം വഴി തങ്ങളുടെ സമ്മതം അറിയിക്കണം.
അപേക്ഷാ ലിങ്ക്: https://forms.gle/xGve7Q29DbXLDpAMA
അപേക്ഷ സമർപ്പിക്കാനുള്ള അവസാന തീയതി 2026 ഒക്ടോബർ 26 വൈകിട്ട് 4 മണി ആണ്. അപേക്ഷയിൽ നൽകുന്ന വിവരങ്ങൾ കൃത്യമായിരിക്കണം. പിന്നീട് വിശദമായ പരിശോധന നടത്തുമെന്നും യോഗ്യതയില്ലെന്ന് കണ്ടെത്തിയാൽ അറിയിപ്പോ നഷ്ടപരിഹാരമോ കൂടാതെ അപേക്ഷ റദ്ദാക്കാമെന്നും ബാങ്ക് വ്യക്തമാക്കിയിട്ടുണ്ട്.
കൂടുതൽ വിവരങ്ങൾക്ക് 0484 2634267, 0484 2634446 എന്നീ നമ്പറുകളിലോ careers@federal.bank.in എന്ന ഇമെയിൽ വിലാസത്തിലോ ബന്ധപ്പെടാം.
ഫെഡറൽ ബാങ്കിന്റെ ടാലന്റ് അക്വിസിഷൻ ടീമിന്റെ പേരിലാണ് അറിയിപ്പ് പുറത്തിറക്കിയിരിക്കുന്നത്.
What's Your Reaction?
