ലോറിയിൽ പ്രത്യേക അറകളിൽ 78 പൊതികളിലായി 156 കിലോ കഞ്ചാവ്, മുകളിൽ മീൻ പെട്ടികൾ; പിടിച്ചത് 50 ലക്ഷത്തിലധികം രൂപയുടെ ലഹരിവസ്തു

പെരിന്തൽമണ്ണയിൽ മീൻ ലോറിയിൽ കടത്തുകയായിരുന്ന കഞ്ചാവുമായി രണ്ടുപേർ പോലീസ് പിടിയിൽ. കണ്ണൂർ കാരാട്ട്കുന്ന് മുഹമ്മദ് റാഹിൻ, മുഴുപ്പിലങ്ങാട് സ്വദേശി ഹർഷാദ് എന്നിവരാണ് അറസ്റ്റിലായത്. ഇവരിൽ നിന്ന് രഹസ്യമായി കടത്താൻ ശ്രമിച്ച 156 കിലോ കഞ്ചാവാണ് കണ്ടെത്തിയത്. ജില്ലാ പോലീസ് മേധാവിക്ക് ലഭിച്ച രഹസ്യ വിവരത്തിന്‍റെ അടിസ്ഥാനത്തിൽ ഇന്ന് പുലർച്ചെ നടത്തിയ പരിശോധനയിലാണ് കഞ്ചാവ് പിടികൂടിയത്. 

മീൻ ലോറിക്കുള്ളിൽ രഹസ്യ അറകൾ ഉണ്ടാക്കി 78 പൊതികളാക്കിയാണ് പ്രതികൾ കഞ്ചാവ് കടത്താൻ ശ്രമിച്ചത്. സംസ്ഥാനത്ത് ചില്ലറ വിൽപ്പനക്ക് ആണ് ഇത് എത്തിച്ചത് എന്നാണ് ഇപ്പോൾ പുറത്തുവരുന്ന പ്രാഥമിക വിവരം. പോലീസിന് ലഭിച്ച രഹസ്യവിവരത്തിന്‍റെ അടിസ്ഥാനത്തിൽ പെരിന്തൽമണ്ണ ബൈപ്പാസിൽ നടത്തിയ പരിശോധനയിലാണ് യുവാക്കൾ കുടുങ്ങിയത്. ഇവർ മിനി പിക്കപ്പ് ലോറിയിൽ സാധാരണ മീൻ കയറ്റി പോകുന്ന രീതിയിൽ പോവുകയായിരുന്നു. വാഹനത്തിൽ നിറയെ മീൻ പെട്ടികളും ഉണ്ടായിരുന്നു. ഈ പെട്ടികൾ കൊണ്ട് കഞ്ചാവ് വെച്ച രഹസ്യ അറകൾ മറച്ചുവെച്ചിരുന്നു.

അതിനാൽ ഒറ്റ നോട്ടത്തിൽ പൊതികൾ കണ്ടെത്താൻ കഴിയുമായിരുന്നില്ല. പോലീസ് വാഹനത്തിൽ നിന്ന് മീൻപെട്ടികൾ പുറത്തെടുത്ത് പരിശോധിച്ചപ്പോഴാണ് രഹസ്യ അറക്കുള്ളിൽ കഞ്ചാവ് കണ്ടെത്തിയത്. എവിടെ നിന്നാണ് കഞ്ചാവ് എത്തിച്ചതെന്ന് ഉൾപ്പെടെയുള്ള കാര്യങ്ങൾ പോലീസ് പ്രതികളോട് ചോദിച്ചു വരികയാണ്. പിടികൂടിയ കഞ്ചാവിന് 50 ലക്ഷത്തിലേറെ രൂപ വിലമതിപ്പുണ്ട് എന്നാണ് പുറത്ത് വരുന്ന വിവരം. സംസ്ഥാന വ്യാപകമായി വിദ്യാഭ്യാസ സ്ഥാപനങ്ങളിലും പൊതു ഇടങ്ങളിലും ലഹരിക്കെതിരെ ക്യാമ്പയിൻ നടക്കുന്നതിനിടെയിലും കഞ്ചാവ് സംസ്ഥാനത്ത് എത്തുന്നത് ആശങ്കക്ക് ഇടയാക്കുന്നു.