കോഹ്‍ലി ടെസ്റ്റ് റാങ്കിങ്ങിൽ ഒന്നാമത്;

ന്യൂഡൽഹി∙ ഇംഗ്ലണ്ടിനെതിരായ ഒന്നാം ക്രിക്കറ്റ് ടെസ്റ്റിൽ പുറത്തെടുത്ത ഉജ്വല പ്രകടനത്തിനു പിന്നാലെ, ഇന്ത്യൻ നായകൻ വിരാട് കോഹ്‍ലി ടെസ്റ്റ് ബാറ്റ്സ്മാൻമാരുടെ ഐസിസി റാങ്കിങ്ങിൽ ഒന്നാമത്. ഓസ്ട്രേലിയൻ താരം സ്റ്റീവ് സ്മിത്തിനെ പിന്തള്ളിയാണ് കോഹ്‍ലി ഒന്നാമതെത്തിയത്. ഏകദിന റാങ്കിങ്ങിൽ നേരത്തേതന്നെ ഒന്നാം സ്ഥാനത്തുള്ള കോഹ്‍ലി, സച്ചിൻ തെൻഡുൽക്കറിനു ശേഷം ഐസിസി ടെസ്റ്റ് റാങ്കിങ്ങിൽ ഒന്നാമതെത്തുന്ന ആദ്യ ഇന്ത്യൻ താരമാണ്.

കരിയറിലെ ഏറ്റവും ഉയർന്ന റേറ്റിങ് പോയിന്റായ 934 പോയിന്റുമായാണ് കോഹ്‍ലി ഒന്നാം സ്ഥാനത്തേക്ക് ഉയർന്നത്. രണ്ടാം സ്ഥാനത്തുള്ള സ്മിത്തിന് 929 പോയിന്റാണുള്ളത്. ശനിയാഴ്ച സമാപിച്ച എജ്ബാസ്റ്റൻ ടെസ്റ്റിൽ ഇന്ത്യ 31 റൺസിന് തോറ്റെങ്കിലും, കോഹ്‍ലി പുറത്തെടുത്ത പ്രകടനം ശ്രദ്ധേയമായിരുന്നു. ഒന്നാം ഇന്നിങ്സിൽ ടെസ്റ്റ് കരിയറിലെ 22–ാം സെഞ്ചുറി നേടിയ കോഹ്‍ലി, രണ്ടാം ഇന്നിങ്സിൽ 17–ാം അർധസെഞ്ചുറിയും നേടിയ കോഹ്‍ലി തകർപ്പൻ ഫോമിലായിരുന്നു. ഇംഗ്ലണ്ട് മണ്ണിൽ കോഹ്‍ലിയുടെ ആദ്യ ടെസ്റ്റ് സെഞ്ചുറി കൂടിയായിരുന്നു ഇത്.

ഇംഗ്ലണ്ട് പര്യടനത്തിനായി എത്തുമ്പോൾ റാങ്കിങ്ങിൽ രണ്ടാമതായിരുന്നു കോഹ്‍ലി. പന്തു ചുരണ്ടൽ വിവാദത്തെ തുടർന്ന് ഒരു വർഷത്തെ സസ്പെൻഷൻ നേരിടുന്ന സ്റ്റീവ് സ്മിത്തായിരുന്നു ഒന്നാമത്. എന്നാൽ, ഇംഗ്ലണ്ടിനെതിരായ ഒന്നാം ടെസ്റ്റിലെ പ്രകടനം കോഹ്‍ലിയെ ചരിത്രത്തിലാദ്യമായി ടെസ്റ്റ് റാങ്കിങ്ങിൽ ഒന്നാമതെത്തിച്ചു. അതേസമയം, രണ്ടാം റാങ്കിലുള്ള സ്മിത്ത് സസ്പെൻഷൻ മൂലം കഴിഞ്ഞ മാർച്ച് മാസത്തിനുശേഷം കളത്തിലിറങ്ങിയിട്ടില്ല. ദക്ഷിണാഫ്രിക്കൻ പര്യടനത്തിലെ കേപ്ടൗൺ ടെസ്റ്റിനിടെയാണ് പന്തുചുരണ്ടൽ വിവാദത്തിൽപ്പെട്ട് സ്മിത്ത് സസ്പെൻഷനിലായത്. അതേസമയം, ഇക്കഴിഞ്ഞ ജനുവരിയിൽ ദക്ഷിണാഫ്രിക്കയിൽ ടെസ്റ്റ് മൽസരം കളിച്ചശേഷം ഇന്ത്യ ടെസ്റ്റ് കളിക്കുന്നതും ഇതാദ്യം.

കോഹ്‍ലി സ്മിത്തിനെ മറികടന്നതല്ലാതെ പുതിയ റാങ്കിങ്ങിലെ ആദ്യ പത്തിൽ മറ്റു മാറ്റങ്ങളില്ല. ഇംഗ്ലണ്ട് ക്യാപ്റ്റൻ ജോ റൂട്ടാണ് പട്ടികയിൽ മൂന്നാമൻ. ന്യൂസീലൻഡ് ക്യാപ്റ്റൻ കെയ്ൻ വില്യംസൻ നാലാമതും ഓസീസ് താരം ഡേവിഡ് വാർണർ അഞ്ചാമതുമുണ്ട്.

അതേസമയം, ഇംഗ്ലണ്ടിനായി മികച്ച പ്രകടനം പുറത്തെടുത്ത ജോണി ബെയർസ്റ്റോ നാലു സ്ഥാനം കയറി പന്ത്രണ്ടാമതെത്തി. വെസ്റ്റ് ഇൻഡീസ് താരം ക്രെയ്ഗ് ബ്രാത്‌വയ്റ്റും പന്ത്രണ്ടാം സ്ഥാനത്തുണ്ട്. ആദ്യ ടെസ്റ്റിൽ ഇംഗ്ലണ്ടിന്റെ വിജയശിൽപിയായ സാം കറനും റാങ്കിങ്ങിൽ നേട്ടമുണ്ടാക്കി. കരിയറിലെ രണ്ടാമത്തെ മാത്രം ടെസ്റ്റ് കളിച്ച ഇരുപതുകാരൻ കറൻ, 80 സ്ഥാനങ്ങൾ കയറി 72ലെത്തി. ശ്രീലങ്കൻ താരം ധനുഷ്ക ഗുണതിലകയും എഴുപത്തിരണ്ടാം റാങ്കിലുണ്ട്. കോഹ്‍ലിക്കു പുറമെ ആദ്യ ടെസ്റ്റില്‍ ഭേദപ്പെട്ട പ്രകടനം പുറത്തെടുത്ത ഹാർദിക് പാണ്ഡ്യ 10 സ്ഥാനം കയറി 57–ാം റാങ്കിലെത്തി.

ബോളർമാരിൽ ജയിംസ് ആന്‍ഡേഴ്സൻ ഒന്നമതു തുടരുന്നു. കഗീസോ റബാഡ രണ്ടാമതും ആദ്യ ടെസ്റ്റിൽ അവസരം ലഭിക്കാതിരുന്ന രവീന്ദ്ര ജഡേജ മൂന്നാമതുമാണ്. ദക്ഷിണാഫ്രിക്കൻ താരം വെർനോൻ ഫിലാൻഡർ നാലാമതും രവിചന്ദ്രൻ അശ്വിൻ അഞ്ചാം റാങ്കിലുമാണ്. ടെസ്റ്റ് ഓൾറൗണ്ടർമാരിൽ ഒന്നാമത് ബംഗ്ലദേശിന്റെ ഷാക്കിബ് അൽ ഹസനാണ്. ഇന്ത്യൻ താരങ്ങളായ രവീന്ദ്ര ജഡേജ രണ്ടാമതും രവിചന്ദ്രൻ അശ്വിൻ നാലാമതുമുണ്ട്.

ടീമുകളിൽ ഇന്ത്യ ഒന്നാം സ്ഥാനത്തു തുടരുന്നു. ദക്ഷിണാഫ്രിക്ക, ഓസ്ട്രേലിയ, ന്യൂസീലൻഡ്, ഇംഗ്ലണ്ട്, ശ്രീലങ്ക, പാക്കിസ്ഥാൻ, വെസ്റ്റ് ഇൻഡീസ്, ബംഗ്ലദേശ്, സിംബാബ്‌വെ എന്നിവരാണ് രണ്ടു മുതൽ 10 വരെ സ്ഥാനങ്ങളിൽ.