വാട്സാപ്പ് ഗ്രൂപ്പുകൾ ശല്യമാകുന്നുണ്ടോ? എങ്ങനെ രക്ഷപ്പെടാം?

സഹപാഠികള്‍, സഹപ്രവര്‍ത്തകര്‍ , നാട്ടുകാര്‍, പ്രവാസി കൂട്ടായ്മ തുടങ്ങി എന്തിനും ഏതിനും ഇന്ന് വാട്സാപ്പ് ഗ്രൂപ്പുകളാണ്. പരിചയക്കാരുമായി ബന്ധം നില നിർത്താനും ആശയ വിനിമയം നടത്താനും കഴിയുന്നുണ്ടെങ്കിലും പലപ്പോഴും അനാവശ്യമായി പല ഗ്രൂപ്പുകളിലും അംഗമാക്കപ്പെടുന്നതാണ് ഒരു വാട്ട്സ്ആപ്പ് ഉപയോക്താവിന് തലവേദന ഉണ്ടാക്കുന്ന പ്രധാന സംഭവം. ചില ഗ്രൂപ്പുകളിൽ നിന്നും എത്ര പുറത്തുകടക്കാന്‍ ശ്രമിച്ചാലും ശല്യക്കാരായ അഡ്മിന്‍മാര്‍ നിങ്ങളെ വീണ്ടും വീണ്ടും ആ ഗ്രൂപ്പിൽ തന്നെ ചേർത്തുകൊണ്ടിരിക്കുകയും ചെയ്യും.

നേരത്തെ നൂറ് അംഗങ്ങളെ മാത്രം ഉൾക്കൊള്ളിക്കാൻ സാധിച്ചിരുന്ന വാട്സാപ്പ് ഗ്രൂപ്പുകളിൽ ഇപ്പോൾ 250 ൽ ഏറെ ആൾക്കാരെ വരെ അംഗങ്ങളാക്കാം. തുടർച്ചയായി വരുന്ന വാട്സാപ്പ് സന്ദേശങ്ങൾ നിങ്ങളുടെ മന:സമാധാനം കളയുന്നുണ്ടെങ്കിൽ അതിനും പരിഹാരമുണ്ട്.

എപ്പോൾ വേണമെങ്കിലും ആർക്കും ഏത് വാട്സാപ്പ് ഗ്രൂപ്പിൽ വേണമെങ്കിലും ആഡ് ചെയ്യാൻ കഴിയുന്ന രീതിയിലാകും നിങ്ങളുടെ ആപ്ലിക്കേഷന്റെ സെറ്റിംഗ്സ്. ഈ സെറ്റിങ്സിൽ ചെറിയ മാറ്റങ്ങൾ വരുത്തിയാൽത്തന്നെ അനാവശ്യ മെസ്സേജുകളിൽ നിന്നും രക്ഷപ്പെടാം.

• നിങ്ങളുടെ ഫോണിലെ വാട്സാപ്പ് തുറക്കുക.
• വാട്സാപ്പിലെ സെറ്റിംഗ് ടാബില്‍ ക്ലിക്ക് ചെയ്ത അക്കൗണ്ട് ഓപ്‌ഷൻ ക്ലിക്ക് ചെയ്യുക.
• അക്കൗണ്ട് ടാബിൽ നിന്നും പ്രൈവസി തിരഞ്ഞെടുക്കുക
• ഇതിൽ ക്ലിക്ക് ചെയ്യുമ്പോൾ താഴെയായി ഗ്രൂപ്പ്സ് എന്ന ഓപ്‌ഷൻ ലഭിക്കും, ഇത് സെലക്ട് ചെയ്യുക.
• ഇവിടെ ക്ലിക്കുമ്പോള്‍ Who can add me to group എന്നതിന് കീഴെ 'Everyone', 'My Contacts, 'Nobody' എന്നിങ്ങനെ മൂന്ന് ഓപ്‌ഷനുകൾ കാണാം. ഇതില്‍ ഉചിതമായവ തിരഞ്ഞെടുക്കാം.

'Nobody'സെലക്ട് ചെയ്താല്‍ ആര്‍ക്കും നിങ്ങളെ ഗ്രൂപ്പില്‍ അഡ് ചെയ്യാന്‍ സാധിക്കില്ലെങ്കിലും ഗ്രൂപ്പ് ഇൻവൈറ്റ് ലിങ്ക് ഉപയോഗിച്ച് നിങ്ങള്‍ക്ക് ആ ഗ്രൂപ്പില്‍ ചേരാം. ഗ്രൂപ്പ് അഡ്മിന്മാർ അയക്കുന്ന ഈ ഇൻവൈറ്റ് സന്ദേശത്തിൽ ഗ്രൂപ്പിന്റെ പേര്, വിവരണം, ഗ്രൂപ്പ് അംഗങ്ങൾ ആരൊക്കെ എന്നെല്ലാമുണ്ടാകും. ഈ ഗ്രൂപിലേക്കുള്ള ക്ഷണം മൂന്നു ദിവസം നിലനിൽക്കും. മറുപടി ലഭിക്കാതിരുന്നാൽ റദ്ദാവുകയും ചെയ്യും.

My Contacts എന്ന ഓപ്‌ഷനാണ് തെരഞ്ഞെടുക്കുന്നതെങ്കിൽ നിങ്ങളുടെ കോൺടാക്ട് ലിസ്റ്റിലുള്ള ആർക്കും അനുമതിയില്ലാതെ നിങ്ങളെ വാട്സാപ്പ് ഗ്രൂപ്പിൽ ചേർക്കാം. അതല്ല Everyone ഓപ്‌ഷനാണ് തെരഞ്ഞെടുക്കുന്നതെങ്കിൽ ഇപ്പോഴത്തെ സ്ഥിതി തുടരും. ആർക്ക് വേണമെങ്കിലും നിങ്ങളെ ഗ്രൂപ്പുകളിൽ ചേർക്കാനാവും.

ലോകത്ത് ഏറ്റവും അധികമാളുകള്‍ ഉപയോഗിക്കുന്ന മെസേജിങ് ആപ്ലിക്കേഷനാണ് ഫേസ്ബുക്കിന്റെ ഉടമസ്ഥതയിലുള്ള വാട്‌സാപ്പ്. 2009ല്‍ യാഹൂവിലെ മുന്‍ ജീവനക്കാരായ ബ്രയാന്‍ ആക്ടനും ജാന്‍ കോമും ചേര്‍ന്നാണ് വാട്സാപ്പ് അവതരിപ്പിച്ചത്. വാട്സ്ആപ്പിനേക്കാൾ ഫീച്ചറുകൾ ഉള്ള പല അപ്ലിക്കേഷനുകളും പിന്നീട് വന്നെങ്കിലും വാട്സ്ആപ്പിന്റെ ജനപ്രീതി മറ്റൊന്നിനും ഇതുവരെ കിട്ടിയിട്ടില്ല എന്നു തന്നെ പറയാം.

ഈയടുത്ത് യൂസേഴ്സിന്റെ ചാറ്റുകള്‍ക്ക് സുരക്ഷയൊരുക്കുന്നതിനായി വാട്സാപ്പ് ഫിംഗര്‍പ്രിന്റ് സംവിധാനം അവതരിപ്പിച്ചിട്ടുണ്ട്. പുറമെ നിന്നുള്ള ഒരാള്‍ക്ക് ആപ്പ് തുറന്ന് സന്ദേശങ്ങള്‍ കാണാൻ കഴിയാത്ത വിധത്തിൽ, മൊബെെല്‍ ഫോണുകളിലുള്ളതു പോലെ ഫിംഗര്‍പ്രിന്റ് ലോക്കാണ് വാട്സാപ്പിൽ നൽകിയിരിക്കുന്നത്. ഒരിക്കല്‍ ഫിംഗര്‍പ്രിന്റ് ലോക്ക് സെറ്റ് ചെയ്താല്‍, യൂസറിന്റെ അനുവാദമില്ലാതെ മറ്റുള്ളവര്‍ക്ക് പിന്നീടത് തുറക്കാവാവില്ല. ഓരോ തവണ ആപ്പ് ഉപയോഗിച്ചതിന് ശേഷം ചാറ്റുകള്‍ എല്ലായ്‌പ്പോഴും പ്രത്യേകം ലോക്ക് ചെയ്ത് വെക്കേണ്ടതില്ല. മാസങ്ങൾക്ക് മുമ്പ് വാട്സാപ്പ് ഈ സംവിധാനം ഐഒഎസിൽ കൊണ്ടുവന്നിരുന്നു.

മൂന്ന് ഓപ്‌ഷനുകളാണ് ഫിംഗർപ്രിന്റ് ഫീച്ചറിലുള്ളത്. ഒരു മിനുട്ട് നേരത്തേക്ക് അണ്‍ലോക്ക് ചെയ്യുക, മുപ്പത് മിനുട്ട് കഴിഞ്ഞ് അണ്‍ലോക്ക് ആവുക അല്ലെങ്കിൽ ഉടനടി അൺലോക്ക് ആവുക. ഇതിൽ ഉടനടി അല്ലെങ്കിൽ Immediate ആണ് കൊടുക്കുന്നതെങ്കിൽ സ്ക്രീൻ ഓഫായാൽ വാട്സാപ്പ് തുറക്കണമെങ്കിൽ ഫിംഗർപ്രിന്റ് വേണ്ടി വരും. ഐഓഎസിൽ ഒരു മിനുട്ട് കഴിഞ്ഞാൽ 15 മിനുട്ട് ഓപ്‌ഷനും ഉണ്ട്.