പോളണ്ട് സെനഗലിനോട് തോറ്റു (2–1)

ഈ തോൽവിയെക്കുറിച്ച് പോളണ്ടിന് ഒരക്ഷരവും പറയാനുണ്ടാകില്ല. ആഫ്രിക്കൻ കരുത്തുമായെത്തിയ സെനഗലിനെതിരെ സമസ്ത മേഖലകളിലും പിന്തള്ളപ്പെട്ട അവർ 1–2നു കീഴടങ്ങി. 37–ാം മിനിറ്റിൽ പോളിഷ് താരം തിയാഗോ സിയെനെക്കിന്റെ സെൽഫ് ഗോളിൽ മുന്നിലെത്തിയ സെനഗലിനു വേണ്ടി എംബായെ നിയാങ്(60–ാംമിനിറ്റ്) വിജയഗോൾ കുറിച്ചു. ഷെഗോ‍ർസ് ക്രിക്കോവിയാക്കിന്റെ വകയായിരുന്നു പോളണ്ടിന്റെ ആശ്വാസ ഗോൾ.

ആദ്യപകുതിയിൽ സെൽഫ് ഗോൾ വഴങ്ങിയതിനു ശേഷമാണ് പോളണ്ട് ആലസ്യത്തിൽനിന്ന് ഉണർന്നത്. ഇടവേളയ്ക്കു ശേഷം അവർ സമനിലഗോളിനു വേണ്ടി പൊരുതന്നതിനിടെ സെനഗൽ ലീഡ് ഉയർത്തിയതോടെ സമ്മർദം എറി. കളിതീരാനിരിക്കെ, ക്രിക്കോവിയാക്ക് നേടിയ ഹെഡർ ഗോൾ പോളണ്ടിന്റെ പരാജയഭാരം കുറച്ചുവെന്നു മാത്രം

സൂപ്പർ താരം റോബർട്ട് ലെവൻഡോവ്സ്കിയും പരിചയസമ്പന്നനായ ബ്ലാച്ചിക്കോവ്സ്കിയും നിറം മങ്ങിയതോടെ പോളണ്ടിന്റെ തന്ത്രങ്ങൾ മിക്കവയും പാളി. പന്തു കിട്ടിയപ്പോഴൊക്കെ മിന്നൽ വേഗത്തിൽ കുതിച്ചെത്തിയ സെനഗൽ സ്ട്രൈക്കർമാർ പോളിഷ് ഡിഫൻഡർമാർക്കു നിരന്തം തലവേദനയായി. മധ്യനിരയിൽ ആധിപത്യം പിടിച്ചെടക്കാനുള്ള പോളണ്ടിന്റെ ശ്രമങ്ങളും സെനഗൽ ഫലപ്രദമായ ടാക്കിളുകളിലൂടെ ചെറുത്തു. ഭാവനാശൂന്യമായ മുന്നേറ്റങ്ങൾക്കൊടുവിൽ പിറന്ന അർധാവസരങ്ങളിൽ ഭാഗ്യം പോളണ്ടിനൊപ്പം നിന്നതുമില്ല