ആദ്യ ദിനം ഹിറ്റടിച്ച് 'റെട്രോ'; പിന്നാലെ 'റെയ്ഡ് 2'വും നാനിയുടെ 'ഹിറ്റ് 3'യും, ഓപ്പണിങ് ഡേ കളക്ഷന്‍ റിപ്പോര്‍ട്ട്

മെയ് ഒന്നിന് തിയേറ്ററുകളില്‍ എത്തിയ സിനിമകളില്‍ വന്‍ നേട്ടം കൊയ്ത് സൂര്യ ചിത്രം ‘റെട്രോ’യും ബോളിവുഡ് ചിത്രം ‘റെയ്ഡ് 2’വും. സിനിമകളുടെ കളക്ഷന്‍ റിപ്പോര്‍ട്ടുകളാണ് പുറത്തുവന്നിരിക്കുന്നത്. തമിഴ്‌നാട്ടില്‍ ഗംഭീര ഹിറ്റ് ആയി മാറിയ റെട്രോയ്ക്ക് കേരളത്തിലടക്കം തണുപ്പന്‍ പ്രതികരണമായിരുന്നു ലഭിച്ചത്. എന്നാല്‍ സിനിമ ആദ്യ ദിനം ബോക്‌സ് ഓഫീസില്‍ നിന്നും നേടിയത്. 19.25 കോടി രൂപയാണ്.

‘കങ്കുവ’യ്ക്ക് ശേഷം ഏറ്റവുമധികം ഓപ്പണിങ് ഡേ കളക്ഷന്‍ നേടുന്ന സൂര്യ ചിത്രമാണിത്. 22 കോടി രൂപയായിരുന്നു കങ്കുവയുടെ ആദ്യ ദിന കളക്ഷന്‍. കാര്‍ത്തിക് സുബ്ബരാജ് സംവിധാനം ചെയ്ത ചിത്രത്തില്‍ പാരിവേല്‍ എന്ന ഗ്യാങ്സ്റ്റര്‍ ആയാണ് സൂര്യ വേഷമിട്ടത്. പൂജ ഹേഗ്‌ഡെയാണ് നായിക. ജോജു ജോര്‍ജ്, സ്വസിക, ജയറാം, നാസര്‍ തുടങ്ങിയ താരങ്ങളും ചിത്രത്തില്‍ വേഷമിട്ടിട്ടുണ്ട്.

അജയ് ദേവ്ഗണ്‍ ചിത്രം ‘റെയ്ഡ് 2’വും 19.25 കോടി രൂപയാണ് ബോക്‌സ് ഓഫീസില്‍ നിന്നും ആദ്യ ദിനം നേടിയ കളക്ഷന്‍. എന്നാല്‍ സിങ്കം എഗെയ്ന്‍, സിങ്കം റിട്ടേണ്‍സ്, ഗോല്‍മാല്‍ എഗെയ്ന്‍ എന്ന സിനിമകളുടെ ഓപ്പണിങ് ഡേ കളക്ഷനേക്കാള്‍ വളരെ പിന്നിലാണ് റെയ്ഡ് 2വിന് ലഭിച്ചിരിക്കുന്നത്. 2018ല്‍ പുറത്തിറങ്ങിയ ‘റെയ്ഡ്’ എന്ന സൂപ്പര്‍ ഹിറ്റ് ചിത്രത്തിന്റെ സീക്വല്‍ ആണ് റെയ്ഡ് 2.

റെട്രോ, റെയ്ഡ് 2 എന്നീ ചിത്രങ്ങള്‍ക്ക് പിന്നാലെ ഇന്ത്യന്‍ ബോക്‌സ് ഓഫീസില്‍ വലിയ നേട്ടം ഉണ്ടാക്കിയിരിക്കുന്നത് നാനി ചിത്രം ‘ഹിറ്റ് 3’ ആണ്. 18 കോടി രൂപയാണ് സിനിമ ആദ്യ ദിനം ബോക്‌സ് ഓഫീസില്‍ നിന്നും നേടിയത്. ശൈലേഷ് കൊലാനുവിന്റെ സംവിധാനത്തില്‍ എത്തിയ ചിത്രം ഹിറ്റ്: ദ തേര്‍ഡ് കേസ് എന്ന ടൈറ്റിലാണ് എത്തിയത്. ശ്രീനിധി ഷെട്ടി ആണ് ചിത്രത്തില്‍ നായികയായത്.

ശശികുമാര്‍-സിമ്രാന്‍ ചിത്രം ‘ടൂറിസ്റ്റ് ഫാമിലി’ക്ക് 2.35 കോടി രൂപയാണ് ഓപ്പണിങ് ദിനത്തില്‍ ബോക്‌സ് ഓഫീസില്‍ നിന്നും നേടാനായത്. അഭിഷാന്‍ ജീവിന്ത് ആണ് ചിത്രം സംവിധാനം ചെയ്തത്. സഞ്ജയ് ദത്ത്-മൗനി റോയ് ചിത്രം ‘ദ ഭൂത്‌നി’ക്ക് വെറും 65 ലക്ഷം രൂപ മാത്രമാണ് ആദ്യ ദിനം ബോക്‌സ് ഓഫീസില്‍ നിന്നും നേടാനായത്.