മകളുടെ മൃതദേഹം 44 ദിവസം ഉപ്പിൽ സൂക്ഷിച്ചു; പീഡനം തെളിയിക്കാൻ അച്ഛന്റെ പോരാട്ടം

മകളെ ബലാത്സംഗം ചെയ്ത് കൊന്നതാണെന്നാരോപിച്ച് മൃതദേഹം 44 ദിവസത്തോളം ഉപ്പ് നിറച്ച കുഴിയിൽ കേടുവരാതെ സൂക്ഷിച്ച പിതാവിനു മുന്നിൽ ഒടുവിൽ അധികൃതർ തലകുനിച്ചു. പീഡനം നടന്നിട്ടുണ്ടോ എന്നതടക്കം പരിശോധിക്കാൻ വീണ്ടും പോസ്റ്റ്മോർട്ടം നടത്തും. ഇതിനായി മൃതദേഹം വ്യാഴാഴ്ച ആശുപത്രിയിലേക്ക് മാറ്റി.

വടക്ക് പടിഞ്ഞാറ് മഹാരാഷ്ട്രയിലെ നന്ദൂർബാറിൽ ആദിവാസി വിഭാഗത്തിൽപെട്ട 21 വയസ്സുകാരിയെയാണ് കഴിഞ്ഞമാസം ഒന്നിനു തൂങ്ങിമരിച്ച നിലയിൽ കണ്ടെത്തിയത്. ആത്മഹത്യയാണെന്നായിരുന്നു പോസ്റ്റ്മോർട്ടം റിപ്പോർട്ട്. എന്നാൽ, മകൾ മരണത്തിനു മുൻപ് പീഡിപ്പിക്കപ്പെട്ടെന്നും പൊലീസ് ശരിയായ രീതിയിൽ അന്വേഷിച്ചില്ലെന്നും പിതാവും ബന്ധുക്കളും ആരോപിച്ചു. തുടർന്നാണ് മൃതദേഹം കൃഷിയിടത്തിൽ തയാറാക്കിയ ഉപ്പ് നിറച്ച കുഴിയിൽ സൂക്ഷിച്ചു വച്ചതിനു ശേഷം പിതാവ് റീ പോസ്റ്റ്മോർട്ടം ആവശ്യപ്പെട്ട് അധികൃതരെ നിരന്തരം സമീപിച്ചത്.

തങ്ങളുടെ പ്രാദേശിക ആചാരത്തിന്റെ ഭാഗമായി മൃതദേഹങ്ങൾ സംരക്ഷിക്കാൻ ഈ വിദ്യ നേരത്തെ ഉപയോഗിച്ചിരുന്നതായി പ്രദേശവാസികൾ അവകാശപ്പെട്ടു. “ശരീരം ജീർണ്ണിച്ചിരുന്നെങ്കിൽ, ഞങ്ങൾക്ക് നീതി നിഷേധിക്കാൻ പോലീസിന് മറ്റൊരു കാരണം ലഭിക്കുമായിരുന്നു. അതിനാൽ, സത്യം പുറത്തുകൊണ്ടുവരുന്ന രണ്ടാമത്തെ പോസ്റ്റ്‌മോർട്ടം പ്രതീക്ഷിച്ച് എനിക്ക് മൃതദേഹം സംരക്ഷിക്കേണ്ടിവന്നു, ”പെൺകുട്ടിയുടെ പിതാവ് ദ ഇന്ത്യൻ എക്സ്പ്രസിനോട് പറഞ്ഞു.

ധഡ്ഗാവ് താലൂക്കിൽ നിന്നുള്ള പെൺകുട്ടിയെ ഓഗസ്റ്റ് ഒന്നിന് വീട്ടിലേക്ക് പോകുന്നതിനിടെ മൂന്ന് യുവാക്കൾ തട്ടിക്കൊണ്ടു പോയതായി പോലീസ് പറഞ്ഞു. ഒരു ദിവസത്തിനുശേഷം, ഇരയായ പെൺകുട്ടി ഗ്രാമത്തിലുള്ള തന്റെ ബന്ധുവിനെ വിളിച്ച് ഒരു രഞ്ജിത് താക്കറെയും മറ്റ് രണ്ട് യുവാക്കളും ചേർന്ന് തന്നെ തട്ടിക്കൊണ്ടുപോയതായി അറിയിച്ചു. എല്ലാവരും തന്നെ ബലാത്സംഗം ചെയ്തെന്നും കൊല്ലാൻ പദ്ധതിയിട്ടിരുന്നെന്നും അവർ പറഞ്ഞു. താൻ ധഡ്ഗാവ് താലൂക്കിലെ വാവി ഗ്രാമത്തിലാണെന്നും അവർ വെളിപ്പെടുത്തി.

പിന്നീട്, തന്റെ മകളുടെ മൃതദേഹം ഗ്രാമത്തിന്റെ പ്രാന്തപ്രദേശത്തുള്ള ഒരു മരത്തിന്റെ കൊമ്പിൽ തൂങ്ങിമരിച്ച നിലയിൽ കണ്ടെത്തിയതായി വാവി ഗ്രാമത്തിലെ ഒരു വ്യക്തിയിൽ നിന്ന് ഇരയുടെ പിതാവിന് ഫോൺ ലഭിച്ചു. ഗ്രാമത്തിൽ എത്തിയപ്പോൾ മൃതദേഹം നിലത്ത് കിടക്കുന്ന നിലയിലായിരുന്നു.

ധഡ്ഗാവ് പോലീസ് ആത്മഹത്യയ്ക്ക് കേസെടുത്ത് അന്വേഷണം ആരംഭിച്ചു. എന്നാൽ രഞ്ജിത്തും രണ്ട് സഹായികളും ചേർന്ന് മകളെ തട്ടിക്കൊണ്ടുപോയി ബലാത്സംഗം ചെയ്ത് കൊലപ്പെടുത്തുകയായിരുന്നുവെന്ന് ഇരയുടെ പിതാവ് പോലീസിനോട് പറഞ്ഞു.

“സർക്കാർ ആശുപത്രിയിൽ പോസ്റ്റ്‌മോർട്ടം നടത്തി ആത്മഹത്യയാണെന്ന് കണ്ടെത്തി. ഇരയുടെ പിതാവിന്റെ മൊഴിയുടെ അടിസ്ഥാനത്തിൽ ഞങ്ങൾ രഞ്ജിത് താക്കറെയെ പിടികൂടുകയും പിന്നീട് വിട്ടയക്കുകയും ചെയ്തു, അയാൾക്കെതിരെ ഒരു കുറ്റവും ഇല്ല, ”ധഡ്ഗാവ് ഡെപ്യൂട്ടി പോലീസ് സൂപ്രണ്ട് ശ്രീകാന്ത് ഭുമ്രെ പറഞ്ഞു.ഓഗസ്റ്റ് രണ്ടിന് മൃതദേഹം ബന്ധുക്കൾക്ക് വിട്ടുകൊടുത്തു. എന്നാൽ മൃതദേഹം അവരുടെ ഗ്രാമത്തിലേക്ക് കൊണ്ടുവന്ന് സംസ്‌കരിക്കേണ്ടതില്ലെന്നായിരുന്നു കുടുംബാംഗങ്ങളുടെ തീരുമാനം.

“എല്ലാ ഗ്രാമവാസികളും ഇരയുടെ കുടുംബത്തെ പിന്തുണയ്ക്കുകയാണ്. സംഭവത്തിൽ ഉൾപ്പെട്ട എല്ലാ പ്രതികളെയും കർശനമായി ശിക്ഷിക്കുന്നതുവരെ മകളെ സംസ്‌കരിക്കില്ലെന്ന് മരിച്ച പിതാവ് തീരുമാനിച്ചു. ധഡ്ഗാവിലെ സർക്കാർ സിവിൽ ആശുപത്രി അധികൃതർ തയ്യാറാക്കിയ പോസ്റ്റ്‌മോർട്ടം റിപ്പോർട്ടിലും ഞങ്ങൾക്ക് സംശയമുണ്ട്. ഞങ്ങളുടെ പെൺകുട്ടിയെ തട്ടിക്കൊണ്ടുപോയി ബലാത്സംഗം ചെയ്തു കൊലപ്പെടുത്തി, കുറ്റവാളികളെ സ്വതന്ത്രമായി വിഹരിക്കാൻ ഞങ്ങൾ അനുവദിക്കില്ല. ഇരയുടെ കുടുംബത്തിന്റെ കൃഷിയിടത്തിൽ ഞങ്ങൾ എല്ലാവരും ഒരു കുഴിയുണ്ടാക്കി, അവളുടെ മൃതദേഹം അതിൽ കിടത്തി, നീതി ലഭിക്കാൻ സംരക്ഷിക്കാൻ ഉപ്പ് കൊണ്ട് മൂടി. അതിനുശേഷം മാത്രമേ ഞങ്ങൾ അവളുടെ മൃതദേഹം സംസ്കരിക്കൂ''- പേരുവെളിപ്പെടുത്താത്ത ഗ്രാമവാസി പറഞ്ഞു.

പ്രതിഷേധം ശക്തമായതോടെ മൂന്ന് പ്രതികൾക്കെതിരെ ധഡ്ഗാവ് പോലീസ് കേസെടുത്തു. “ഇരയുടെ കുടുംബാംഗങ്ങളും ബന്ധുക്കളും നൽകിയ വിശദാംശങ്ങളിലും മൊഴികളിലും ഞങ്ങൾ സംതൃപ്തരാണ്. പരാതിയുടെ അടിസ്ഥാനത്തിൽ, വാവി ഗ്രാമത്തിലെ താമസക്കാരായ രഞ്ജിത് താക്കറെ, സുനിൽ വാൽവി, അമർ വാൽവി എന്നീ മൂന്ന് പ്രതികളെ ഞങ്ങൾ ഇന്ന് അറസ്റ്റ് ചെയ്തിട്ടുണ്ട്. ഇപ്പോൾ കൂടുതൽ വിശദാംശങ്ങൾ പറയാൻ ബുദ്ധിമുട്ടാണ്. അന്വേഷണം പുരോഗമിക്കുകയാണ്‌" ഭുമ്രെ പറഞ്ഞു.

“ഒരു മജിസ്‌ട്രേറ്റിന്റെ സാന്നിധ്യത്തിൽ പോസ്റ്റ്‌മോർട്ടം വീഡിയോ റെക്കോർഡ് ചെയ്യും. എല്ലാ രേഖകളും നടപടിക്രമങ്ങളും ക്രമീകരിക്കുന്നതിന് സമയമെടുക്കും, ”ആശുപത്രിയിൽ നിന്നുള്ള ഒരു ഉദ്യോഗസ്ഥൻ പറഞ്ഞു.

nglish Summary: A tribal man in Maharashtra’s Nandurbar district preserved the body of his daughter in a salt pit at his agricultural field for 44 days demanding justice for her alleged gangrape and murder.