ധനകാര്യ കമ്മിഷന് ചെയര്മാന് ഇന്നു കേരളത്തില്; സന്ദര്ശനം പതിനാറാം ധനകാര്യ കമ്മിഷന് റിപ്പോര്ട്ട് തയാറാക്കുന്നതിന് മുന്നോടിയായി
പതിനാറാം ധനകാര്യ കമ്മിഷന് ഇന്ന് കേരളത്തിലെത്തും. ചെയര്മാന് ഡോ. അരവിന്ദ് പനഗാരിയയും കമ്മിഷന് അംഗങ്ങളും മൂന്നുദിവസമാണ് കേരളത്തിലെ സന്ദര്ശനത്തിനായി നീക്കിവെച്ചിരിക്കുന്നത്. പതിനാറാം ധനകാര്യ കമ്മിഷന് റിപ്പോര്ട്ട് തയാറാക്കുന്നതിനുള്ള പഠനയാത്രയുടെ ഭാഗമായാണ് കമ്മീഷന്റെ സന്ദര്ശനം.
ഇന്നു ഉച്ചയ്ക്ക് കൊച്ചിയിലെത്തുന്ന സംഘത്തെ ധനകാര്യ മന്ത്രി കെ എന് ബാലഗോപാല്, ചീഫ് സെക്രട്ടറി ശാരദാ മുരളീധരന് തുടങ്ങിയവര് ചേര്ന്ന് സ്വീകരിക്കും. ധനകാര്യ കമ്മിഷന് മുമ്പാകെ കേരളത്തിന്റെ ആവശ്യങ്ങള് മുന്കൂട്ടി അവതരിപ്പിക്കാനും അര്ഹതപ്പെട്ട സാമ്പത്തിക അവകാശങ്ങളെല്ലാം നേടിയെടുക്കാനും കൃത്യമായ മുന്നൊരുക്കങ്ങളാണ് സംസ്ഥാന സര്ക്കാര് സ്വീകരിച്ചിട്ടുള്ളതെന്ന് മന്ത്രി ബാലഗോപാല് പറഞ്ഞു. കമ്മിഷന്റെ റിപ്പോര്ട്ടിനും സംസ്ഥാനങ്ങള്ക്കുള്ള ധനവിഹിതം സംബന്ധിച്ച തീര്പ്പുകള്ക്കും വലിയ പ്രധാന്യമാണുള്ളത്.
പകല് 11.30 മുതല് സംസ്ഥാന ധനകാര്യ കമ്മീഷന് ചെയര്മാന് ഡോ. കെ എന് ഹരിലാല്, ഗ്രാമ, ബ്ലോക്ക്, ജില്ലാ പഞ്ചായത്ത് അസോസിയേഷനുകള്, ചേമ്പര് ഓഫ് മുന്സിപ്പല് ചെയര്മാന്, മേയേഴ്സ് കൗണ്സില് പ്രതിനിധികള് തുടങ്ങിയവരുമായാണ് ചര്ച്ച. ഉച്ചയ്ക്കുശേഷം 12.45 മുതല് വ്യാപാരി, വ്യവസായി പ്രതിനിധികളെ കാണും. 1.45 മുതല് രാഷ്ട്രീയ പാര്ട്ടികളുടെ പ്രതിനിധികളുമായാണ് കൂടികാഴ്ച. തുടര്ന്ന് കമീഷന് ചെയര്മാന് വാര്ത്താ സമ്മേളനവും നടത്തും.
അഞ്ചുവര്ഷ കാലായളവില് സംസ്ഥാനങ്ങള്ക്ക് കേന്ദ്ര സര്ക്കാരില്നിന്ന് ലഭിക്കേണ്ട ഭരണഘടനപരമായ സാമ്പത്തിക പിന്തുണ സംബന്ധിച്ച തീര്പ്പുകള് നിശ്ചയിക്കുകയാണ് ധനകാര്യ കമ്മിഷന്റെ ചുമതല. 2026 ഏപ്രില് ഒന്നുമുതലാണ് കമ്മിഷന്റെ ശുപാര്ശ പ്രകാരമുള്ള ധനവിഹിതം കേരളത്തിന് ലഭിച്ചു തുടങ്ങുക.
What's Your Reaction?
