വാട്സാപ്പിലെ വലിയൊരു ശല്യത്തിന് പരിഹാരമായി

ജനപ്രിയ സോഷ്യല്‍മീഡിയ ആപ്ലിക്കേഷൻ വഴി ദിവസവും നിരവധി മെസേജുകളും വിഡിയോകളും ചിത്രങ്ങളുമാണ് ലഭിക്കുന്നത്. നിരവധി ഗ്രൂപ്പുകളില്‍ അംഗമായവർക്ക് ഒരേ മെസേജ് തന്നെ ഒന്നിൽ കൂടുതൽ തവണ ഫോർവേർഡായി ലഭിക്കും. ഉപയോക്താവിന്റെ സമയവും ഡേറ്റയും കളയുന്ന ഈ ശല്യത്തെ നിയന്ത്രിക്കാൻ വാട്സാപ്പ് തന്നെ പുതിയ ഫീച്ചർ അവതരിപ്പിക്കുകയാണ്.

ഫോർവേർഡ് ചെയ്യുന്ന സന്ദേശങ്ങളെ പെട്ടെന്ന് കണ്ടെത്താൻ സഹായിക്കുന്ന ഫീച്ചറാണിത്. സുഹൃത്തുക്കൾ അയക്കുന്ന മെസേജുകള്‍ മറ്റു ഗ്രൂപ്പുകളിൽ നിന്നു ഫോർവേർഡ് ചെയ്തതാണോ എന്ന് കണ്ടെത്താൻ ഈ ഫീച്ചർ വഴി സാധിക്കും. വാട്സാപ്പിന്റെ 2.18.179 എന്ന ബീറ്റാ പതിപ്പിലാണ് പുതിയ ഫീച്ചർ ഉൾപ്പെടുത്തിയിരിക്കുന്നത്.

ഫോർവേർഡ് ചെയ്തു വരുന്ന മെസേജുകൾക്കെല്ലാം പ്രത്യേകം ലേബൽ കാണും. സ്പാം, വ്യാജ സന്ദേശങ്ങളെ നിയന്ത്രിക്കാൻ ഫോർവേർഡ് മെസേജ് ഫീച്ചറിന് സാധിക്കുമെന്നാണ് കരുതുന്നത്. ലഭിക്കുന്ന സന്ദേശങ്ങളെല്ലാം ഒന്നും നോക്കാതെ ഫോർവേർഡ് ചെയ്താൽ വൻ ദുരന്തത്തിൽ കുടങ്ങുന്നതും പതിവ് വാർത്തയാണ്.<