താരപ്രചാരകനായി തൃശൂരിലെത്തി ഡികെ ശിവകുമാർ, മുഖ്യമന്ത്രിക്കും ബിജെപിക്കും വിമർശനം

കെ മുരളീധരനുവേണ്ടി താരപ്രചാരകനായി തൃശൂരിലെത്തി കർണാടക ഉപമുഖ്യമന്ത്രി ഡികെ ശിവകുമാർ. കേരളത്തിലെ ഏറ്റവും കരുത്തനായ സ്ഥാനാർഥികളിലൊരാളാണ് മുരളീധരൻ, കോൺഗ്രസിന്റെ ട്രബിൾ ഷൂട്ടറാണ് മുരളീധരനെന്നും ശിവകുമാർ വിശേഷിപ്പിച്ചു. ഒല്ലൂരിൽ സംഘടിപ്പിച്ച റോഡ് ഷോയും പൊതുസമ്മേളനവും ശിവകുമാർ ഉദ്ഘാടനം ചെയ്തു.

‘ട്രബിൾ ഷൂട്ടർ’ എന്നതുകൊണ് അർത്ഥമാക്കുന്നത് പ്രതിസന്ധി ഘട്ടങ്ങളെ അതിജീവിക്കാനുള്ള കഴിവ് എന്നതാണ്. കെ മുരളീധരൻ കരുത്തുള്ള സ്ഥാനാർഥിയതിനാലാണ് പ്രധാനമന്ത്രി നരേന്ദ്ര മോദി രണ്ടും മൂന്നും തവണ തൃശൂരിലെത്തേണ്ടി വരുന്നതെന്നും ശിവകുമാർ പറഞ്ഞു. കേരളത്തിൽ എൽഡിഎഫിന് വോട്ട് ചെയ്യുന്നവരോർക്കണം, നിങ്ങൾ ബിജെപിയെയാണ് ശക്തിപ്പെടുത്തുന്നത്. ബിജെപിയെ തോൽപ്പിക്കാൻ കഴിയുന്നത് കോൺഗ്രസിനു മാത്രമാണെന്നും ശിവകുമാർ പറഞ്ഞു.

മുഖ്യമന്ത്രി പിണറായി വിജയനെതിരെയും ശിവകുമാർ ആഞ്ഞടിച്ചു. മറ്റു സംസ്ഥാനങ്ങളിൽ മുഖ്യമന്ത്രിമാരെ വരെ ഇഡി വേട്ടയാടുമ്പോൾ കേരളത്തിൽ മുഖ്യമന്ത്രിയെയും കുടുംബത്തെയും തൊടുന്നില്ല എന്നായിരുന്നു വിമർശനം. കർണാടകത്തിൽ ബിജെപിക്കൊപ്പം നിൽക്കുന്ന പാർട്ടിയാണ് ജെഡിഎസ്. കേരളത്തിൽ ഇടതുമുന്നണിക്കൊപ്പവും. ഇടതു സർക്കാരാണോ അതോ എൻഡിഎ സർക്കാരാണോ കേരളത്തിൽ ഭരണം നടത്തുന്നതെന്ന് മുഖ്യമന്ത്രി വ്യക്തമാക്കണമെന്നും ഡികെ ശിവകുമാർ വെല്ലുവിളിച്ചു.

പ്രധാനമന്ത്രിയെ തന്നെ തൃശ്ശൂരിലേക്കെത്തിക്കാൻ ബിജെപി ഒരുങ്ങുന്നതിനിടയിലാണ് താര പ്രചാരകനായ കർണാടക ഉപമുഖ്യമന്ത്രി ഡികെ ശിവകുമാറിനെ കളത്തിലിറക്കിയുള്ള കോൺഗ്രസ് പ്രചാരണം. താരപ്രചാരകന്റെ വരവിൽ കോൺഗ്രസ് പ്രവർത്തകരും ഇളകി മറിഞ്ഞു. ദേശീയ നേതാക്കളെ കളത്തിൽ ഇറക്കി തിരഞ്ഞെടുപ്പ് പ്രചാരണം മുന്നണികൾ ശക്തിപ്പെടുത്തുന്നതിന്റെ ഭാഗമായാണ് ശിവകുമാറും തൃശൂരിൽ എത്തിയത്.