കേരളത്തിൽ നിന്നുള്ള പഴം-പച്ചക്കറികൾക്ക് യു.എ.ഇയിൽ താൽക്കാലിക വിലക്ക്
നിപ്പാ വൈറസ് ബാധ സ്ഥിരീകരിച്ച സാഹചര്യത്തിൽ കേരളത്തിൽ നിന്നുള്ള പഴവർഗങ്ങളും പച്ചക്കറികളും ഇറക്കുമതി ചെയ്യുന്നതിന് യു.എ.ഇ താൽക്കാലിക വിലക്കേർപ്പെടുത്തി. ഇനിയൊരു അറിയിപ്പുണ്ടാകുന്നത് വരെയാണ് കേരളത്തിൽ നിന്നുള്ള ഇറക്കുമതി വിലക്കിയത്.
നിപ്പാ വൈറസ് ബാധ സ്ഥിരീകരിച്ച സാഹചര്യത്തിൽ കേരളത്തിൽ നിന്നുള്ള പഴവർഗങ്ങളും പച്ചക്കറികളും ഇറക്കുമതി ചെയ്യുന്നതിന് യു.എ.ഇ താൽക്കാലിക വിലക്കേർപ്പെടുത്തി. ഇനിയൊരു അറിയിപ്പുണ്ടാകുന്നത് വരെയാണ് കേരളത്തിൽ നിന്നുള്ള ഇറക്കുമതി വിലക്കിയത്. വവ്വാൽ കടിച്ച പഴവർഗങ്ങൾ കഴിച്ചത് മൂലമാണ് നിപ്പാ പകർന്നതെന്ന സാമൂഹിക മാധ്യമങ്ങളിലുൾപ്പെടെയുള്ള പ്രചാരണങ്ങളാണ് കയറ്റുമതിയുടെ താൽക്കാലിക വിലക്കിലേക്ക് നയിച്ചത്.
സാധാരണ ദിവസങ്ങളിൽ 130 മുതൽ 150 ടൺ പച്ചക്കറിയാണ് കൊച്ചിയിൽ നിന്നു കയറ്റിയയക്കുന്നത്. ഇതേ രീതിയിൽ തിരുവനന്തപുരം, കരിപ്പൂർ വിമാനത്താവളങ്ങളിൽ നിന്നും കയറ്റുമതി ചെയ്യുന്നുണ്ട്. ശീതീകരിച്ച കാർഗോ വിമാനങ്ങളിൽ കേരളത്തിൽ നിന്ന് കൊണ്ടുപോകുന്ന പച്ചക്കറികൾക്ക് ഗൾഫ് രാജ്യങ്ങളിൽ ആവശ്യക്കാരേറെയാണ്.
കേരള ഓർഗാനിക് എന്ന പേരിലാണ് കേരള പച്ചക്കറികൾ കയറ്റുമതി ചെയ്യുന്നത്. കാർഷിക ശാസ്ത്രജ്ഞരുടെ മേൽനോട്ടത്തിൽ പരിശോധനകൾ നടത്തി സർട്ടിഫിക്കറ്റുകൾ നേടിയാണ് ഓർഗാനിക് പച്ചക്കറികൾ കുവൈത്ത്, ഖത്തർ, യു.എ.ഇ, സൗദി അറേബ്യ, ഒമാൻ, ബഹ്‌റൈൻ തുടങ്ങിയ രാജ്യങ്ങളിലെത്തുന്നത്. നിപ്പാ വൈറസ് ബാധയെത്തുടർന്ന് കയറ്റുമതിക്ക് വിലക്കേർപ്പെടുത്തിയത് ഈ രംഗത്ത് പ്രവർത്തിക്കുന്നവർക്ക് വൻ തിരിച്ചടിയാണ്.
കേന്ദ്ര സർക്കാർ രാജ്യത്ത് ചരക്ക് സേവന നികുതി നടപ്പിലാക്കിയതിന് ശേഷം ഗൾഫ് രാജ്യങ്ങളിലേക്കുള്ള പച്ചക്കറി കയറ്റുമതിയിൽ വൻ തകർച്ച നേരിട്ടിരുന്നുവെങ്കിലും അടുത്തിടെ മേഖലയിൽ നേരിയ നേട്ടം പ്രകടമായിരുന്നു.
What's Your Reaction?
