സഹായഹസ്തവുമായി ബിഎസ്എൻഎല്ലും; നാലു ജില്ലകളിൽ കോൾ, ഡേറ്റ സൗജന്യം

കൊച്ചി∙ മഴക്കെടുതിയിൽ വലയുന്ന കേരളത്തിലെ നാലു ജില്ലകളിൽ കോൾ, ഡേറ്റ നിരക്കുകളിൽ ഇളവുകളും സൗജന്യവും പ്രഖ്യാപിച്ച് ബിഎസ്എൻഎൽ. പ്രളയം സാരമായി ബാധിച്ചിട്ടുള്ള വയനാട്, ഇടുക്കി, ആലപ്പുഴ, പാലക്കാട് ജില്ലകളിലുള്ളവർക്കായി ഓഗസ്റ്റ് 23 വരെയാണ് ഓഫറുകൾ.

ഈ ജില്ലകളിലെ ഉപഭോക്താക്കൾക്ക് ഇന്ത്യയിൽ എല്ലായിടത്തെയും ബിഎസ്എൻഎൽ നമ്പരുകളിലേക്കു സൗജന്യമായി വിളിക്കാം. ഈ ഓഫറിന് പരിധിയില്ല. ഇതിനു പുറമെ ബിഎസ്എൻഎൽ ഇതര നമ്പരുകളിലേക്ക് ദിവസേന 20 മിനിറ്റും സൗജന്യമായി വിളിക്കാം.

ഈ ജില്ലകളിലെ ഉപഭോക്താക്കൾക്ക് ദിവസേന 500 എംബി ഇന്റർനെറ്റും സൗജന്യമായി ഉപയോഗിക്കാം. 500 എംബി പരിധി പിന്നിട്ടാൽ ഇന്റർനെറ്റ് സ്പീഡ് 80 കെബിപിഎസ് ആയി താഴുമെന്നാണ് അറിയിപ്പ്.